ᐊᒃᓱᕈᕈᑕᐅᓯᒪᔪᑦ ᑕᐅᖅᓰᖃᑦᑕᐅᑎᓂᕐᒧᑦ

1800 ᐃᓱᓕᓕᖅᑎᓪᓗᒋᑦ, ᑕᕆᐅᑉ ᐊᑭᐊᓂᓐᖔᕐᑐᑦ ᐊᕐᕙᒐᓱᒃᑏᑦ ᐅᒥᐊᕐᔪᐊᑦ ᓴᖅᑭᑎᑦᑎᓚᐅᖅᓯᒪᕗᑦ ᑮᓇᐅᔭᓕᐅᕈᑕᐅᔪᓐᓇᕐᓂᖏᓐᓂᒃ ᓇᑦᑎᕋᓱᖕᓂᐅᑉ ᐅᑭᐅᖅᑕᖅᑐᒥ. ᕼᐊᑦᓴᓐᔅ ᐸᐃ ᑲᒻᐸᓂᒃᑯᑦ ᑕᐅᖅᓰᖃᑎᖃᖃᑦᑕᓕᕆᓪᓗᑎᒃ ᐃᓄᖕᓂᒃ ᑭᖑᓂᐊᒍᑦ. ᓇᑦᑎᖅ ᓂᕿᑦᑎᐊᕙᐅᓚᐅᖅᓯᒪᕗᖅ ᐊᒻᒪᓗ ᐊᖑᓇᓱᒃᑎᓂᑦ ᑮᓇᐅᔭᓕᐅᕈᑕᐅᔪᓐᓇᕐᖢᓂ. ᓇᑦᑎᕋᓱᐊᕐᓂᖅ ᐱᒻᒪᕆᐅᖏᓐᓇᕐᖢᓂ ᑮᓇᐅᔭᓕᐅᕈᑕᐅᔪᓐᓇᕐᑐᖅ ᓄᓇᕗᑦᒥ, 1960-ᖏᓐᓂᓗᓐᓃᑦ ᓂᕐᔪᑎᓂᒃ ᓯᕐᓈᖅᑏᑦ ᐊᑭᕋᖅᑐᖅᐸᓪᓕᐊᓯᒋᐊᕋᓗᐊᖅᑎᓪᓗᒋᑦ ᕿᓰᑦ ᓂᐅᕕᐊᖑᖃᑦᑕᕐᓂᖏᓐᓄᑦ. ᑕᐃᒪᓐᓇ ᐊᔭᐅᖅᑕᐅᓂᕐᒥᖕᓄᑦ ᓯᕐᓈᕐᑎᓂᑦ, ᐊᒥᐊᓕᒐᐃᑦ ᑲᔪᓯᑎᑦᑎᓚᐅᖅᓯᒪᕗᑦ ᐃᒪᕐᒥᐅᑕᐃᑦ ᒥᐊᓂᕆᔭᐅᓂᖏᓐᓄᑦ ᒪᓕᒐᕐᒥᒃ 1972-ᒥ. ᓄᓇᕗᒥᐅᑕᐃᑦ ᓇᑦᑏᑦ ᕿᓯᖏᑦ ᓱᓕ ᓇᒃᓯᐅᑎᔭᐅᔪᓐᓇᖏᑦᑐᑦ ᐊᒥᐊᓕᒐᐃᑦ ᓂᐅᕕᕐᕕᖁᑎᖏᓐᓄᑦ ᐅᓄᕐᓂᖃᓪᓗᐊᖅᑐᑦ 85 ᐳᓴᒥᒃ ᑕᒪᐃᓐᓂᑦ ᑲᓇᑕᒥᐅᑦ ᒥᖅᑯᓕᖕᓄᑦ ᐊᐅᓪᓚᖅᑎᖃᑦᑕᕐᑕᖏᓐᓂᒃ.

1980-ᖏᓐᓂ, ᑕᕆᐅᑉ ᐊᑭᐊᓂᒥᐅᑦ ᑲᑎᒪᕕᕐᔪᐊᖓᑦ ᐊᖏᔪᒻᒪᕆᖕᓂᒃ ᐊᔪᓕᕈᑕᐅᔪᓂᒃ ᓴᖅᑭᑦᑎᓚᐅᖅᓯᒪᕗᑦ ᓇᑦᑏᑦ ᑕᐅᕗᖓ ᐊᐅᓪᓚᖅᑎᑕᐅᖃᑦᑕᕐᓂᖏᓐᓄᑦ, ᐱᔾᔪᑎᖃᕐᖢᑎᒃ ᓂᐅᕙᓐᓛᒥ ᓇᑦᑎᕋᓱᖃᑦᑕᕐᓂᐅᔪᒧᑦ. ᐅᖃᐅᑕᐅᓚᐅᕈᓗᐊᖅᑎᓪᓗᒍ ᐃᓄᐃᑦ ᐱᖃᑕᐅᑎᑕᐅᔾᔮᖏᓐᓂᖏᓐᓂᒃ, ᐊᔾᔨᒌᓐᖏᑎᑕᐅᓚᐅᖏᑦᑐᑦ ᑭᓯᐊᓂ ᓂᐅᕙᓐᓛᒥᐅᑦ ᐊᒻᒪᓗ ᓄᓇᕗᑦᒥᐅᑦ ᑭᓯᖁᑎᖏᑦ ᓂᐅᕕᖅᐸᒃᑐᓂᑦ. ᑕᒪᐃᑕ ᕿᓰᑦ ᓂᐅᕕᐊᒃᓴᐅᖃᑦᑕᕐᓂᖏᑦ ᓄᖅᑲᓚᐅᖅᓯᒪᕗᑦ, ᐊᒻᒪᓗ ᕿᓯᖕᓄᑦ ᑮᓇᐅᔭᓕᐅᕈᓐᓇᕐᓂᖅ ᓄᓇᕗᑦᒥ ᐊᓯᐅᓪᓗᓂ. ᕿᓰᑦ ᓂᐅᕕᐊᖑᖃᑦᑕᕐᓂᖏᑦ ᑲᑕᒃᖢᑎᒃ 50,000-ᒥᑦ 1977-ᒥ, 1,000 ᑐᖔᓄᑦ 1988-ᒥ.

ᓂᐅᕕᐊᒃᓴᖃᕈᓐᓇᐃᓪᓕᓂᖅ ᐱᔾᔪᑎᒋᓪᓗᒍ ᐊᖏᔪᒻᒪᕆᖕᒥᒃ ᒥᒃᖠᒋᐊᖅᑎᑦᑎᓚᐅᕐᐳᖅ ᑮᓇᐅᔭᓕᐅᕈᑕᐅᔪᓐᓇᕐᑐᓂᒃ ᓂᖅᑭᒃᓴᖅᓯᐅᖅᓯᓐᓇᑦ ᐊᖑᓇᓱᖕᓂᐅᕙᒃᑐᒥ ᐊᒻᒪᓗ ᐊᑕᐅᓯᐅᖏᑦᑐᓂᒃ ᐊᖏᔪᓂᒃ ᐊᑲᐅᓐᖏᓕᐅᕈᑕᐅᔪᓂᒃ ᐊᒃᑐᐃᔪᓂᒃ ᐃᓅᓯᓕᕆᓂᕐᒧᑦ, ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪᓗ ᑲᑎᒪᖃᑦᑕᕐᓂᒃᑯᑦ ᐃᓗᐊᓐᖏᓕᐅᕈᑕᐅᔪᓂᒃ.

ᓱᓕ ᒥᖅᑯᓖᑦ ᐱᓪᓗᒋᑦ ᐊᑭᕋᖅᑐᖅᑏᑦ ᐱᓕᕆᒐᓗᐊᖅᑎᓪᓗᒋᑦ, ᑭᓰᑦ ᐊᑐᖅᑕᐅᔪᒪᖃᑦᑕᕐᓂᖏᑦ ᐅᑎᓚᐅᖅᓯᒪᕗᖅ 1990-ᖏᓐᓂ. ᑕᕆᐅᑉ ᐊᑭᐊᓂ ᑮᓇᐅᔭᓕᐅᕐᓂᖓᑦ ᑲᑕᒃᓯᒪᓕᕐᓂᖓ ᐃᓚᖓᒍᑦ ᐊᒃᑐᖅᑕᐅᓪᓗᓂ ᓴᓐᖏᔪᑎᒍᑦ ᓴᐃᓂᓰᑦ ᐊᒻᒪᓗ ᐅᓛᓯᐊᒃᑯᑦ ᐱᔪᒪᖃᑦᑕᕐᓂᖏᑎᒍᑦ ᓄᓇᕗᑦᒥᑦ ᕿᓯᕋᔭᖕᓂᒃ ᐱᔾᔪᑕᐅᓗᐊᕐᖢᓂ. ᑲᓇᑕᒥ ᕿᓯᕋᔭᐃᑦ ᐊᓐᓄᕌᓕᐊᖑᓯᒪᓪᓗᑎᑦ ᓂᐅᕕᖅᑕᐅᔪᒪᖃᑦᑕᕐᓂᖏᑦ ᐊᖏᓕᒋᐊᖅᓯᒪᔪᒻᒪᕆᒃ ᓄᓇᕗᑦ ᓴᖅᑭᑕᐅᓚᐅᖅᑎᓪᓗᑎᑦ ᓂᐅᕕᑕᐅᔪᒪᖃᑦᑕᕐᓂᖏᑦ ᐊᖏᓕᒋᐊᖅᑎᓪᓗᒍ. ᑕᒪᓐᓇ ᐱᔪᒪᔭᐅᓂᖏᑦ ᐊᔭᐅᖅᑑᑕᐅᔪᖅ ᐊᒥᓲᖏᑦᑐᓂᑦ ᓇᖕᒥᓂᖅ ᑮᓇᐅᔭᓕᐅᕋᓱᐊᕐᕕᖃᕐᑐᓂᑦ ᐊᒻᒪᓗ ᐃᓄᑐᐊᓂᑦ ᐊᓐᓄᕌᓕᐅᖅᑎᓂᑦ\ᓴᓇᔨᓂᑦ ᐱᓕᕆᐊᖃᕐᑐᓂᑦ ᐊᖏᕐᕋᒥᖕᓂ.

ᓱᓕ ᓄᓇᕐᔪᐊᕐᒥ ᐊᓯᐅᑎᑦᑎᑦᑕᐃᓕᒪᓂᕐᒧᑦ ᔫᓂᐊᓐᖏᑦ, ᓄᓇᕐᔪᐊᒥ ᐊᖏᓂᖅᐹᖑᔪᑦ ᐊᒻᒪᓗ ᐃᒃᐱᒋᔭᐅᓂᖅᐹᖑᒧᑦ ᑎᒥᐅᔪᑦ, ᑲᔪᓯᑎᑦᑎᓚᐅᕈᓗᐊᖅᑎᓪᓗᒋᑦ ᐱᖁᔨᕗᖔᕈᑎᒥᒃ 2004-ᒥ ᑲᑎᒪᕕᒡᔪᐊᖅᑎᓪᓗᒋᑦ ᑎᓕᐅᕆᓪᓗᑎᒃ ᐃᓚᒋᔭᐅᔪᖁᑎᒥᖕᓂᒃ ᒐᕙᒪᐅᔪᓂᒃ ᓄᑖᓂᒃ ᓂᐅᕕᕋᕈᑕᐅᖏᑦᑐᓐᓇᕐᑐᓂᒃ ᕿᓯᕕᓂᕐᓄᑦ ᓴᖅᑭᑦᑎᖁᓇᒋᑦ ᓄᖑᓕᒑᖏᑦᑐᓂᑦ ᓂᕐᔪᑎᓂᑦ, ᓯᕗᓂᒃᓴᒥ ᓄᖅᑲᖅᑎᑦᑎᓇᓱᐊᕐᓂᐅᔪᑦ ᓱᓕ ᓴᖅᑭᖃᑦᑕᕐᑐᑦ.

ᑕᕆᐅᑉ ᐊᑭᐊᓂᑦ ᓂᕐᔪᑎᓄᑦ ᓯᕐᓈᖅᑏᑦ, ᐃᑲᔪᖅᑕᐅᓪᓗᑎᒃ ᐊᒥᐊᓕᒐᓂ ᐃᓖᔭᖅᓱᐃᑦᑕᐃᓕᒪᓂᕐᒧᑦ ᓴᓴᐃᐊᑎᖏᓐᓂᑦ ᐊᒻᒪᓗ ᓄᓇᕐᔪᐊᓕᒫᒥ ᑲᒪᔨᐅᔪᑦ ᓂᕐᔪᑏᑦ ᐱᓪᓗᒋᑦ, ᓱᓕ ᑲᔪᓯᑎᑦᑎᓇᓱᒃᑐᑦ ᑕᒪᐃᓐᓂᒃ ᕿᓯᕈᔪᖕᓂᒃ ᓂᐅᕕᐊᒃᓴᖃᖃᑦᑕᖁᔨᓇᑎᒃ ᑕᕆᐅᑉ ᐊᑭᐊᓂ ᓄᓇᖃᕐᑐᓄᑦ. ᓂᕐᔪᑎᓂᒃ ᓯᕐᓈᖅᑏᑦ ᑎᒥᖏᑦ ᐅᖃᖃᑦᑕᕐᑐᑦ ᐃᑲᔪᖅᑐᐃᓂᕋᖅᖢᑎᒃ ᓄᓇᖃᖅᑳᕐᓯᒪᔪᑦ ᒥᖅᑯᓕᖕᓂᒃ ᐊᖑᓇᓱᖃᑦᑕᕐᓂᖏᓐᓂᒃ, ᑭᓯᐊᓂ ᑖᒃᑯᐊ ᑎᒥᐅᔪᑦ ᓂᐅᕕᐊᒃᓴᖃᖃᑦᑕᖁᔨᖏᑦᑐᑦ ᖃᓄᑐᐃᓐᓇᖅ.

ᓄᓇᕗᑦᒥᐅᑦ ᐃᓂᖃᖃᑕᐅᔪᒪᔪᑦ ᓄᓇᕐᔪᐊᒥ ᓂᐅᕕᕋᖃᑦᑕᐅᑎᖃᑦᑕᕐᓂᕐᒧᑦ. ᐃᓄᐃᑦ ᐅᑕᖅᑭᔪᑦ ᐱᕕᒃᓴᖃᖅᑎᑕᐅᔪᒪᓪᓗᑎᒃ ᑐᓂᓯᖃᑦᑕᕈᓐᓇᕐᓂᒃᑯᑦ ᐱᖁᑎᒋᔭᒥᖕᓂᒃ ᐊᒻᒪᓗ ᐱᔪᓐᓇᕐᓂᕐᒥᖕᓂᒃ ᓯᕗᓂᒃᓴᑦᑎᐊᕙᖃᕈᓐᓇᖁᓪᓗᒋᑦ. ᐃᒃᐱᒋᔭᐅᓯᒪᔪᑦ ᐊᓯᐅᑎᑦᑎᑦᑕᐃᓕᒪᐃᓐᓇᕐᓂᖅ ᐊᒻᒪᓗ ᓂᐅᕕᕋᖃᑦᑕᐅᑎᓂᐅᔪᕐᓗ ᐊᑕᐅᑦᑎᒃᑯᑦ ᑲᔪᓯᔪᓐᓇᕐᒪᑕ. ᐊᐃᑦᑖᖑᒐᓗᐊᖅ, ᒪᓕᒃᑕᐅᔭᕆᐊᓖᑦ ᖃᐅᔨᓴᖅᑕᐅᓂᒃᑯᑦ ᑐᓐᖓᕕᖃᕐᑐᑦ ᐊᓯᐅᑎᑦᑎᑦᑕᐃᓕᒪᓗᓂ ᐊᖑᓇᓱᖃᑦᑕᕐᓂᕐᒧᑦ ᓱᓕ ᑐᓗᕈᑕᐅᖕᒪᑕ.

 

img